سؤال الساعة في طنطا العظيمة
” أنتخب مين ؟؟؟ “

سؤال يبدو محير في ظاهره عند العامة لكنه محسوم في الحقيقة عند أهل هذا الباب ممن عاشوا في الكواليس ويعرفون ما يدور في البواطن قبل الظواهر فهؤلاء يعرفون حقيقة الأشياء و كيف تدار الأمور وبالتالي يعرفون من يناسب هذه المواقع من أشخاص يقدرون علي النجاح بل ويملكون ما يستلزم لخلق فرصه وتمهيد طرقه و التغلب علي عوائقه و موانعه ،،،

طيب يعني برضه أنتخب مين ؟؟؟

ممكن تكون الاجابة : انتخب أصحابك وحبايبك مثلا ،،،

ولكن ما أتعسها من اجابة فهذه ليست انتخابات مجلس إدارة اتحاد ملاك أو رابطة عائلة لتعاملها بهذا الاستخفاف ولا حتي انتخابات مجلس النواب لتضمن ان حبيبك دا هيمضيلك وزير أو هيمشيلك مصلحة عطلانة دي انتخابات نادي يا عزيزي يعني أقصي حاجة ممكن حبيبك لو نجح يخدمك فيها إنه يدخلك وانت ناسي كارنيهك وحتي هذه الخدمة الجليلة جعلها نظام الدخول الإليكتروني الجديد لا قيمة لها فالشاهد انه لا فائدة من انتخاب حبايبك نهائي صدقني دا غير بقي ان حبايبك دول لو غرقوا النادي وضيعوه خسرت انت المتنفس الوحيد لك ولأسرتك اجتماعيا ورياضيا فخلي بالك الله يسترك .

وممكن تكون الإجابة انتخب المشاهير المعروفين ،،،

و دي طبعا اجابة لا تليق الا بالعجزة لأن ليس وراءها أي منطق في الحقيقة لأن كوّن الباشا مشهور أو معروف ليس دلالة علي أي شئ يضمن نجاحه في مهمته اللي انت جايبه يؤديها وانت المستفيد أو الخاسر الأول من أداؤه يعني لازم تفهم ان لا فائدة من شهرته نهائيا لا علي صعيد العمل العام ولا علي المستوي الشخصي بالنسبة لمن أعطاه صوته يعني كدة يبقي ترجع للإجابة الأولي وتنتخب حبايبك أرحم أهو علي الأقل لما يشوفوك هيسلموا بحرارة وهاتك يا بوس وأحضان في الوقت اللي المشاهير هيتنكوا عليك كمتطفل من جماهيرهم فاحسبها صح وبلاش سذاجة …

برضه ما عرفناش “أنتخب مين ؟؟؟”

إجابتي لك ونصيحتي في نفس الوقت ان كان فعلا نادي طنطا يمثل لك ركنا أصيلا من أركان حياتك كما هو بالنسبة لي طبعا ،

انتخب من يضمن لك أن يكون النادي بقعة من المتعة المحترمة مغلفة بالأمان والود ،،،

انتخب أشخاص محترمة وفِي نفس الوقت أصحاب قدرات إدارية مش واحدة فيهم فقط لأن المحترم وبس دا تروح تناسبه مش تمسكه منصب اداري خدمي ،،،

انتخب ناس أصحاب فكر مختلف ومبدع وغير تقليدي وأهم من كدة انهم يملكون القدرة علي تنفيذه وتطبيقه -وإلا يبقي يا فرحتي بالفكر و الإبداع- وبالتالي يضمنوا ريادة النادي و تفوقه ،،،

انتخب ناس مولودين في النادي ومتربيين فيه فهم اكتر ناس لامسة المشكلة و عايشنها وأهم من كدة عارفين خبايا العلاج و أسراره -وإلا يا فرحتي بمعرفة المشاكل وتشخيصها وبقاءها في خلقتنا- ،،،

من الاخر البوست دا لمساعدتك لو انت لست من أهل الكواليس و بالتالي لا تعرف أين تذهب فهذا ترشيح لمن اعتقد انهم نموذج ومثال لكلامي وهذا طبعا ليس حصرا و لا ينفي وجود غيرهم جديرين بالثقة …